Badira ia bost hamarkada Sahats euskaltegian helduak euskalduntzen ari garela. Irakasle batzuek 35 urtetik gora egin ditugu langintza honetan. Urte horietan guztietan, asko eta asko izan dira gure euskaltegian euskalduntzea lortu duten herritarrak.
Gure euskaltegiaren helburua ahalik eta euskal hiztun gehien lortzea da, ahalik eta epe laburrenean. Helburu hori erdiesteko, metodologia komunikatiboa erabiltzen dugu, gure ikasleek egunerokoan maizenik dituzten behar komunikatiboak euskaraz bete ditzaten, bizitzaren alor guztietan euskaraz eroso eta egoki ari daitezen.
Eskola emateko erabiltzen ditugun materialak eta programazioa Iruñerriko IKAk sortuak dira, eta 40 urtetik gorako lan didaktikoaren emaitza dira.
Sorreratik beretik, Sahats euskaltegiak berebiziko garrantzia eman izan dio euskarazko kultur jarduerari, ikasleen euskalduntze prozesua bizkortzeko tresna eta euskara ikasten segitzeko akuilu izateaz gain, euskaldunok orotariko kultur adierazpenak gure hizkuntzan gozatzeko bide den aldetik. Euskaldunon tradizio eta ohiturei lotutako jarduerak ez ezik, ehunka kultur ekitaldi ere antolatu ditu Barañaingo euskaltegiak: hitzaldiak, musika emanaldiak, film proiekzioak, liburu aurkezpenak, mahai inguruak, ibilaldiak… Euskara erabiliz irakasten baitugu IKAn, gure hizkuntza bizitzaren alor guztietan erabili ahal izateko.
Jarraitu IKA Barañain
sareetan
